جهاد یو سپېڅلی عبادت دی، دجهاد یو هدف د دین، ناموس، اواسلامي ارزښتونو ساتنه، له ظلم او وحشت نه د مظلومانو، بې وسه اوبې کسه خلکو ژغورنه ده، د جهاد مقصد د انسانانو وژل او ځورول، د ښارونو ورانول او د کلیو تخریبول ندي، همدا وجه ده چې داسلام په تاریخ کې له کفارو سره معاهدې شوې دي، د اهل الذمه وو دسر او مال د ساتنې سپارښتنې یې کړې دي، دنبي کریم صلی الله علیه وسلم او خلفاء راشدینو رضي الله عنهم نه رانیولې تر ننه پورې د اسلام د ویاړلي تاریخ په اوږدو کې د جهاد سترو قائدینو خپلو ملګرو ته په مسلسله توګه دا توصیه کړیده چې: په جګړه کې ښځې، ماشومان، بوډاګان او راهبان مه وژنئ!

د مقدس جهاد ستر قائد نبي کریم صلی الله علیه وسلم د حربي ( جنګي) کافرانو د ښځو، ماشومانو، بوډاګانو او راهبانو د وژلو نه منعه کړیده، امام بخاري رحمه الله په خپل صحیح کې دعبد الله بن عمر رضي الله عنهما نه روایت راوړی، هغه وایي: د جګړې په میدان کې یوه وژل شوې ښځه وموندل شوه، کله چې رسول الله صلی الله علیه وسلم ولیده نو دښځو او ماشومانو وژل یې ښه ونه ګڼل، او د هغوی له وژلو څخه یي منعه وکړه! ديته ورته ډیر نبوي احادیث راغلي دي او د پورتني حکم تایید کوي.

که له یوې خوا د جنګي کفارو د ښځو، ماشومانو او بوډاګانو وژل د اسلام د اصولو مطابق جواز نلري، او اسلامي امارت هم چا ته ددې اجازه نه ده ور کړې، او نه یې ور کوي، نو بلې خوا ته بیا د مسلمانو ښځو، ماشومانو او بوډاګانو ژغورل د مقدس جهاد له موخو نه یو ستر هدف دی، الله جل جلاله د سورت نساء په (۷۵) آیت کریمه کې فرمایي: تاسو ولي د الله عز وجل په لاره کې او د هغو کمزورو خلکو، ښځو او ماشومانو د خلاصون لپاره جهاد نکوئ چې وایي: ای زموږ پالونکیه (ربه) موږ له دغه کلي څخه وباسي چې اوسیدونکي یي ظالمان دي....

دا یو روښانه حقیقت دی چې د اسلامي امارت عاليقدر امیر امیر المومنین ملا محمد عمر مجاهد او ملګرو یې د نبي کریم صلی الله علیه وسلم په پیروۍ ډیر ځله خپلو مؤمنو مجاهدینو ته په واضحو کلماتو کې توصیه کړیده چې تر خپله وسه وسه د ملکي تلفاتو مخنیوی وکړي، او هغو کسانو ته سزا ورکړي چې په دې هکله احتیاط نکوي، مجاهدین په دې اړه دومره د مسولیت احساس کوي چې د ملکي تلفاتو د مخنیوي په مقصد یې یوه مستقله اداره هم جوړه کړیده. او له مقابل لوري څخه یې غوښتنه کړې ده چې په دې اړه باید یو درې اړخیز کمیسیون جوړ شي چې دملګرو ملتونو استازي هم پکې وي. مګر دښمن تر اوسه دې کار ته تیاری نه دی ښودلی. ځکه چې په ملکي تلفاتو کې لوی لاس د دوئ دی.

بل خوا د هر جهادي کال په پیل کې د مجاهدینو لپاره مشخص اهداف ټاکل کیږي، چې هغوی یې په نښه کړي، او له مؤمنو هیوادوالو نه په درناوي سره او د دوی د ژغورني په خاطر هیله کیږي چې هغو ځایونو ته دې نه ورځي او نه دي ور نېږدې کیږي چې هلته دښمن یا د هغوی حامیان اوسیږي، یا د هغوی د تګ راتګ سیمه وي ځکه چې دا د جګړې میدان دی، هسي نه چې خدای مکړه دوی ته کوم زیان ورسېږي.

موږ یو ځل بیا د خپلو مؤمنو هیوادوالو نه په درناوي هیله کوو چې د اشغالګرو او د هغوی له ګوډاګیانو سره د کارکولو او نېږدې والي څخه دې ډډه وکړي او له هغو ځایونو څخه دې ځانونه لیرې ساتي، په کومو ځایونو کې چې دښمن اوسیږي یا هلته تګ راتګ کوي، ځکه تجربو ثابته کړیده چې دښمن د مجاهدینو د حملو په مهال پر ملکي وګړو ډزې کوي، بې ګناه خلک ولي، ځوروي یي او وژني یي. والله الموفق